പ്രശസ്ത തബല വിദ്വാൻ സാക്കിർ ഹുസൈൻ അന്തരിച്ചു. ഹൃദയാഘാതത്തെത്തുടർന്ന് സാൻഫ്രാൻസിസ്കോയിലെ ആശുപത്രിയിൽ ചികിത്സയിലിരിക്കെയാണ് മരണം സംഭവിച്ചത്. 73 വയസായിരുന്നു. രക്തസമ്മർദ്ദ പ്രശ്‌നങ്ങളും മറ്റ് ആരോഗ്യപരമായ തകരാറുകളും നേരിടുകയായിരുന്ന അദ്ദേഹം കഴിഞ്ഞ ഒരാഴ്ചയായി ആശുപത്രിയിൽ ചികിത്സയിലായിരുന്നു.

1951-ൽ മുംബൈയിലെ മാഹിമിലാണ് സാക്കിർ ഹുസൈൻ ജനിച്ചത്. ബാല്യത്തിൽ തന്നെ സംഗീതപ്രതിഭയ്ക്ക് രൂപം നൽകിയ അദ്ദേഹം മൂന്ന് വയസ്സുമുതൽ തബലയുമായി അടുപ്പം തുടങ്ങി. 12-ആം വയസ്സിൽ സജീവമായി സംഗീത പരിപാടികളിൽ പങ്കാളിയാകുകയും ചെയ്തു. മുംബൈയിലെ സെന്റ് സേവ്യേഴ്‌സ് കോളജിൽ വിദ്യാഭ്യാസം പൂർത്തിയാക്കിയ സാക്കിർ, 1970-ൽ 18-ആം വയസ്സിൽ സിത്താർ മാസ്റ്റ്രോ രവി ശങ്കറിനൊപ്പം ആദ്യ അന്താരാഷ്ട്ര സംഗീതപരിപാടി അവതരിപ്പിച്ചു.

പാശ്ചാത്യ സംഗീതലോകത്തും സാക്കിർ ഹുസൈൻ വേറിട്ട പടവുകൾ കുറിച്ചു. പ്രശസ്ത പോപ്പ് ബാൻഡ് ‘ദി ബീറ്റിൽസ്’ ഉൾപ്പെടെ നിരവധി രാജ്യാന്തര സംഗീതജ്ഞരുമായി സഹകരിച്ച അദ്ദേഹം, 1999-ൽ യുഎസ് നാഷണൽ ഹെറിറ്റേജ് ഫെലോഷിപ്പ് നേടി. ഈ പുരസ്‌കാരം അമേരിക്കയിലെ പരമ്പരാഗത കലാപ്രതിഭകൾക്ക് നൽകുന്ന ഏറ്റവും വലിയ ബഹുമതിയായിരുന്നു.

ഭാരത സർക്കാർ അദ്ദേഹത്തെ പത്മശ്രീ, പത്മഭൂഷൺ, പത്മവിഭൂഷൺ പുരസ്‌കാരങ്ങൾ നൽകി ആദരിച്ചു. 

മലയാള സിനിമയുമായി ദീർഘകാല ബന്ധം പുലർത്തിയ സാക്കിർ, ‘വാനപ്രസ്ഥം’ അടക്കമുള്ള ചിത്രങ്ങൾക്ക് സംഗീതമൊരുക്കിയിട്ടുണ്ട്. ഹീറ്റ് ആൻഡ് ഡസ്റ്റ്, ദി പെർഫെക്റ്റ് മർഡർ, മിസ് ബ്യൂട്ടിസ് ചിൽഡ്രൻ, സാസ് തുടങ്ങിയ ചിത്രങ്ങളിൽ അഭിനയിച്ചിട്ടുമുണ്ട്.

പ്രശസ്ത കഥക് നർത്തകി അന്റോണിയ മിനെക്കോയാണ് ഭാര്യ. അനിസ ഖുറേഷി, ഇസബെല്ല ഖുറേഷി എന്നിവർ മക്കളാണ്.